প্ৰৱন্ধ
নম্বৰ প্ৰতিযোগিতাত শিক্ষাৰ্থীৰ মানসিকতা
বৰ্তমান যুগ প্ৰতিযোগিতাৰ যুগ। নম্বৰৰ পিছত দৌৰাত সকলো ব্যস্ত। নম্বৰৰ প্ৰতিযোগিতাত প্ৰকৃত জ্ঞান লাভ কৰাত গুৰুত্ব নিদি সকলো মাত্ৰ কেইটামান নম্বৰৰ পিছত দৌৰ মাৰিছে। জ্ঞানক আওকাণ কৰি বৰ্তমান বেছি ভাগ ছাত্র-ছাত্ৰীয়ে মাৰ্ক শ্বীটৰ ওপৰত গুৰুত্ব দিয়ে। কিয়নো এই মাৰ্ক শ্বীট খনৰ ওপৰতেই যেন তেওঁ লোকৰ জীৱনৰ কৃতকাৰ্যতা নিৰূপিত হৈ আছে। নম্বৰৰ দৌৰত ভাটৌ পঢ়ন পদ্ধতি অৱলম্বন কৰি ছাত্র-ছাত্ৰীয়ে কি শিকিলোঁ, কি বুজিলোঁ-জানিলো এইবোৰ বিবেচনা নকৰি কেৱল মাত্ৰ প্ৰতিযোগিতা খনিত হে গুৰুত্ব দিয়ে। জ্ঞানৰ তেওঁলোকৰ বিচাৰ্য বিষয় নহয়। নম্বৰৰ প্ৰতিযোগিতা খনিত কোনে কাক পৰাজিত কৰিব পাৰে এইটোক লৈহে ছাত্র-ছাত্ৰীৰ পৰা পিতৃ-মাতৃ লৈকে সকলো অভ্যস্ত। হয় এখন ভাল মাৰ্ক শ্বীটে আমাক জীৱনত বহুদূৰ সহায় কৰিব। জীৱন ধাৰণৰ এটা উপায় আমাক মাৰ্ক শ্বীট খনে আনি দিব পাৰে। নম্বৰৰ তাগিদাত আমি লাভান্বিত হ'ব পাৰোঁ। বৰ্তমান বিশ্ব যি দিশে ধাৱিত হৈছে, তাক চাই সেই বিশ্বত তিষ্ঠি থাকিবৰ বাবে সকলো নম্বৰমূখী হৈছে আৰু বহু সময়ত তাৰ প্ৰয়োজনীয়তা দেখা দিয়ে। কিন্তু এই মানসিকতাই ছাত্র-ছাত্ৰীৰ মনত জ্ঞানৰ কচৰৎ কৰোৱাত সফল হোৱা নাই। নম্বৰৰ বাবে জ্ঞান কেৱল পাঠ্যক্ৰমৰ মাজতেই সীমাবদ্ধ থাকে। সমাজ খনক বুজি উঠাৰ, বিশ্লেষণ কৰাৰ যি মানসিকতা ছাত্র-ছাত্ৰীৰ বিকাশ হ'ব লাগে সেয়া কেৱলমাত্ৰ নম্বৰমূখী চিন্তা-ধাৰাই আনি দিব নোৱাৰে।
নম্বৰৰ বিশ্বত সকলো সকলো একো-একোজন স্বাৰ্থপৰ। নিজৰ জ্ঞান বা জনা কথা আনক শিকালে তেওঁ "মোতকৈ" বেছি পাৰিব, বেছি নম্বৰ পাব এনেধৰণৰ মানসিকতা দেখা যায়। কিন্তু জ্ঞান বা নিজে জনা কথা আনক শিকালে আচলতে শিকোৱা জনৰ হে প্ৰকৃত উন্নতি হ'ব। জ্ঞান যিমান পাৰি সিমান বিলাব লাগে। আলোচনা কৰিব লাগে। নজনা কথা আনক শিকাই দিলে দুয়ো উপকৃত হ'ব। কিন্তু ছাত্র-ছাত্ৰীৰ মনত সৰুৰ পৰা নম্বৰৰ প্ৰৱণতা সোমোৱাই দিয়া হয়। যিয়ে ছাত্র-ছাত্ৰীৰ মনত স্বাৰ্থ-ন্বেষী মনোভাৱৰ বীজ ৰূপণ কৰে। ইয়াৰ ফলত কম নম্বৰৰ তাগিদাত, আনতকৈ তুলনা মূলক ভাৱে কম পোৱা নম্বৰৰ বাবে বহু ছাত্র-ছাত্ৰীয়ে মানসিক হতাশাত ভুগে। নম্বৰৰ প্ৰতিযোগিতাত সকলোৱে আনক বিফল কৰোৱাত গুৰুত্ব দিয়ে। কিন্তু তেওঁ বুজি পোৱা উচিত যাতে প্ৰতিযোগিতা নিজৰ লগত হে কৰিব লাগে। ছাত্র-ছাত্ৰীয়ে জনা উচিত যে জ্ঞানৰ বিস্ফোৰণ হ'লে সমাজৰ উন্নতি হয়। অতি নম্বৰমূখী প্ৰৱণতাই জ্ঞানৰ বিস্ফোৰণত বাধা দিয়ে। লগতে ই মানসিক হতাশাৰ কাৰণ।গতিকে ছাত্র-ছাত্ৰীয়ে নম্বৰতকৈ জ্ঞানক অধিক গুৰুত্ব দিব লাগে।
আজিৰ ছাত্র-ছাত্ৰী কাইলৈ দেশৰ নাগৰিক। তেওঁলোকেই একো-একোজন মানৱ সম্পদ ৰূপে কাইলৈ সমাজ খনক পৰিচালিত কৰিব। সেয়েহে তেওঁলোকে জ্ঞান আহৰণত অধিক গুৰুত্ব দি নিজৰ সৈতে প্ৰতিযোগিতাত অৱতীৰ্ণ হ'ব লাগে। যিমান পাৰি জ্ঞান বুটলিব লাগে আৰু আনকো সেই জ্ঞান বিলাব লাগে। নম্বৰমূখী বিশ্বত ছাত্র-ছাত্ৰীৰ মানসিকতা, দৃষ্টিভংগী তেতিয়া হে পৰিৱৰ্তন হ'ব।
নাম - অস্মিতা লাহন
ঠিকনা-গোলাঘাট
দূৰভাষ-৯৩৬৫৭০৪৫৭৬
No comments:
Post a Comment