সহযাত্ৰী (তৃতীয় খণ্ড)
✍️ ঋতুপর্ণা ইংতিপি/মৰিগাঁও
গা-পা ধুই আজৰি হোৱা মানে তিনি বাজিলে।তাইৰ ভাগৰো বহুত লাগিছে। গোটেই দেহটো অৱশ হৈ পৰিছে। হাত ভৰি অচল হৈ যোৱা যেন লাগি গৈছে। নীলা ৰঙৰ আঁঠুলৈ পৰা ফ্ৰক, গালে মুখে পানীৰ টোপালবোৰ বিৰিঙি আছে। চুলিখিনি আউল বাউল হৈ যেনিতেনি পৰি আছে। বিছনাখনত গাটো এৰি চকুকেইটা মুদি দিলে অৰুণিমাই।
কলেজৰ প্ৰথমদিন বুলিয়ে মন উগুল থুগুল আছিল। চকুৰ টোপনি চকুতে নোহোৱা হ'ল। কিবা বিশেষ দিন থাকিলে, ৰাতিটো নাযায় নোপোৱাই। সাত বজাতে প্ৰগতিয়ে গৰম গৰম ভাত এগাল খোৱাই কলেজলৈ লৈ যায়।
: ভাত বাঢ়িলোঁ আহা মাজনী।
:
: মাজনী
:
: আহা আকৌ।
ভাগৰত টোপনিয়ে হেঁচি ধৰা দেহটো বিছনাৰ পৰা উঠাব পৰা নাই। মুখেৰে মাতিব পৰা নাই তাই।
মাত নাপায় প্ৰগতি তাইৰ ৰুমলৈ আহি জোৰ নি কৰি তাইক ভাতৰ পাতত বহুৱালে।
: মা আপুনি এতিয়ালৈ ভাত খোৱাই নাই ..?
:তোমাক এৰি খাব পাৰোঁ জানো।দুয়োজনীয়ে খাম বুলি ৰৈ আছোঁ।
: আপুনিও যে নহয় মা! বহক, মা খাওক ।
: খোৱা খোৱা। খাই লৈ অলপ আৰাম কৰা।আজি ভাগৰ লাগিছে তোমাৰ।
মাটিমাহৰ সাৰ আঞ্জাৰ, কচুৰ সৈতে মাছৰ জোল অকণ, পটল, ভেণ্ডিৰ শুকান ভাজি আৰু ঘৰতে বনোৱা আমৰ আচাৰ।
প্ৰগতিক গোসাঁই ঘৰত প্ৰাৰ্থনা গোৱা শুনি সাৰ পালে অৰুণিমাই। মুখ হাতত ধুই সেৱা ল'লে তাই। গোটেই ঘৰৰ মহলটো ধূপ ধূনাৰ গোন্ধ বিয়পি পৰিল। সন্ধিয়াৰ চাহকাপ দুয়োজনীয়ে বাৰান্দাত বহিয়ে খায়।
মূৰৰ বিষটো আজি উজাই আহিছে। কপালে মূৰে নাৰিকলৰ তেল অলপ লগাই সোনকালে শুলে তাই।
******
প্ৰথম দিনা আহোঁতে তাই কলেজৰ পৰিৱেশটো ভালকৈ মন নকৰিলে। এডমিছনৰ দিনা নিবিড়ৰ লগত আহিছিল। আটক ধুনীয়া চকুত লগা গেটখনৰ বাহিৰ দুচকীয়া, চাৰিচকীয়া বাহনবোৰ ৰখোৱা আছে। মেইন ৰোডৰ লগতে সোঁফালে কলেজখন। বাওঁফালে দোকান-পোহা বোৰ আছে।
কলেজৰ গাতে বাওঁফালে DIET খন আছে তাৰ মাজত সৰু ৰাস্তা এটা আছে, তাতে অস্থায়ী দোকান বোৰ বহে। কাষে কাষে বাইক, স্কুটি। সেইফালে কলেজৰ দ্বিতীয়খন গেট আছে।
সন্মুখৰ ডাঙৰ গেটত তলা মৰা। সৰু গেটৰফালে অহা যোৱা কৰি আছে মানুহবোৰ। টেবুল চকী পাৰি চকীদাৰ এজন থাকে। ভিতৰত সোমাই সোঁফালে ডাঙৰ বেলগছ এজোপা। মাজতে এখন নানা ৰঙী ফুলৰ বাগিছা।তাৰ ওচৰতে দুটা মহলাৰ বিল্ডিংটোৰ ওপৰৰ মহলাত মহাবিদ্যালয়ৰ পুথি ভঁৰাল। কাষকে KKHSOU ৰ চেন্টাটো।নাকৰ পোনে পোনে গ'লে কলেজৰ খেলপথাৰখন। ওচৰতে ষ্ট'ডিয়াম আৰু অডিট'ৰিয়ামটো আছে।বাওঁফালে ল'ৰাবোৰ কমন ৰুম। সেউজীয়া ঘাঁহনি ডৰাৰ সৈতে বহিব জিৰণি ল'ব পৰাকৈ গছৰ তলত ধুনীয়া সুবিধা আছে।
: হাই, গুড মর্নিং অৰু।
: গুড মর্নিং।
: আহি পালা।
: অ' ব'লা ভিতৰলৈ।
: ৯ বাজিব হ'লেই।
বকুলৰ তলে তলে দুয়োজনীয়ে খোজ ল'লে। সুগন্ধি ধূপৰ গোন্ধ নাকত লাগিছে। সন্মুখতে প্ৰিন্সপাল ছাৰ। এই সময়ত তেওঁ সদায় ৰৈ থাকে সেই ঠাইত।ক্লাছ হৈছে নে নাই এইবোৰো নিৰীক্ষণ কৰে।তিনিজন কৰ্মচাৰী আছে ওচৰতে। দুয়োকাষে দুখন থালত ধূপ আৰু বন্তি জ্বলাই থোৱা আছে। মজিয়াখন তিতি আছে। ধূপ জ্বলোৱাৰ আগত পানী চটিয়াই লৈছিল।
: গুড মর্নিং ছাৰ।
: গুড মর্নিং।
চিৰিকেইটা পাৰ হৈয়ে ছোৱালী কমন ৰুম। বাওঁফালে অৰুণিমাহঁতৰ বিভাগ আৰু ক্লাছ ৰুম। ওচৰতে হিন্দী বিভাগটো আছে।
আগলৈ......!!
