স্মৃতিৰ ওখ ঘাটেৰে শৰত আহে:হীৰামনি লাহন

 স্মৃতিৰ ওখ ঘাটেৰে শৰত আহে:

আজি  শৰতৰ 
প্ৰথম কুঁৱলী পৰিছে ,
নিয়ৰে আহি আঁজলি দুৱৰিডৰাৰ 
আচঁল সেমেকাই তুলিছে  ।
নাজানো কিয়  
আজি তোমাৰ কথাই 
বাৰে বাৰে আহি 
মোক বৰকৈ  আমনি কৰিছে  ।
জানানে , 
আজি তোমাৰ চকুত চকু থৈ 
এটি নিৰ্ঘাট সপোন দেখাৰ 
বৃৃথা হাবিয়াস  জাগিছে    ;
শৰত আগতেও আহিছিল, 
মোৰ স্মৃতিৰ ধূসৰিত পৃষ্ঠাত 
শৰতে বহুতো ছবি 
আঁকি আঁকি মচিছিল  ,
মই নজনাকৈয়ে মোৰ  পৰা যেন  
আতৰি গুছি গৈছিল 
বহু স্মৃতিৰ ওখ ওখ ঘাট  ,
আৰু ,
মোক বিছাৰি আহিও  এদিন 
উভতি  গৈছিল 
শৰতৰ উতনুৱা  চৌখিন আকাশ  ।
এতিয়া,
আহিনৰ কোমল কহুঁৱাৰ ঢৌ তুলা 
অনুভৱ  বোৰ  বুটলিবলৈ
নোপোৱাৰ বেদনাত, 
মোৰ মুখৰ ৰেখাত এতিয়া 
জিলিকিছে 
পৃথিৱীৰ  অৱসাদ  ।
হীৰামনি লাহন   । গোলাঘাট  ।