মদাৰ ফুল
কাঁইটেৰে আবৃত বৃক্ষৰ ফুল
ৰঙা মদাৰ প্ৰকৃতিৰ বৰদান,
গোন্ধহীন অথচ আকৰ্ষণৰ মূল
লঠঙা ডালত হৰ্ষৰ অঙ্কুৰণ !
মদাৰে ৰঙীন কৰে ফাগুনৰ মুখ
তেজ ৰঙা ফুলে গায় মৌন গান,
প্ৰকৃতিৰ প্ৰলেপৰ সঞ্চাৰিত সুখ
পঁচোৱাৰে সতে তোলে ঐক্যতান !
সৰ্বস্ব হেৰুৱাই নগ্ন ডালত ফুলে
ফাগুনৰ মায়াত প্ৰসৱ বেদনাত,
ধূলি বালিৰ প্ৰসাধন দেহত সানি লৈ
বসন্তক আদৰে বস্ত্ৰহীন সাজত !
ন সৌন্দৰ্য্যৰে পৰিপূৰ্ণ কৰে প্ৰকৃতি
পখীৰ কাকলিৰে মুখৰিত বৃক্ষ,
এই ফুলৰ পূজাত দেৱ-দেৱী অতুষ্টি
অনাদৃত বুলি সবে কৰে কটাক্ষ !
মদাৰৰ নগ্নতাই বসন্তৰ বিজ্ঞাপন
বতাহৰ ছেৱত উটি ভাঁহি যায়,
কাঁইটতে স্থান নিজক দিয়ে বিসৰ্জন
এলাগি হ'লেও ধৰাক নকৈ সজায় !
___________________________________
আমিৰ হুছেইন আহমেদ ।
No comments:
Post a Comment