অণুগল্প--
অলিখিত
পুৱাৰ পৰা বিচাৰি বিচাৰি বেলি লহিওৱাৰ পৰত তাই মানুহটো থকা ৰূমটো বিচাৰি ওলিয়ালে ।
গুৱাহাটীৰ মেপ প্ৰতিদিনে সলনি হয় । পতাক ভাঙে, ভঙাক পাতে । ভায়েকটো আছিল বুলিহে লগত ।
পিছে আজি কালি সি তাত নাথাকে । আগতে ডেৰ বছৰ মান তাই জগতৰ লগত পলাই আহি তাতে আছিল । সেয়েহে ঘৰৰ মালিকে তাইক চিনি পালে । তেওঁ জনালে সি আজি কালি শান্তি পাৰাত থাকে । পিছে তাক জগত নহয় JD বুলিহে জানে সেই ঠাইত । কাষত সাতমহীয়া কেচুৱাটো লৈ ওৰে দিন ঘুৰি ঘুৰি ভাগৰ লাগিছে যদিও মানুহটো বিছাৰি যাবই লাগিব । আজি সম্পূৰ্ণ এটা বছৰ মানুহ টোৰ খবৰ খাতি নাই । তাইৰ গাত লেঠা হোৱা বাবে শাহুৱেকে তাইক জগতৰ লগত গুৱাহাটীলৈ আকৌ নপঠালে । এনেকুৱা অৱস্থাত এৰি অহা মানুহ জনীৰ এটা খবৰ কৰা নাই । মনত অনেক অমংগলীয়া চিন্তা লৈ অগত্যা তাক বিচাৰি আহিবলৈ তাই বাধ্য হ'ল । প্ৰথমে কামৰ হেঁচাত সময় নোপোৱা বুলিয়ে ভাৱিছিল তাই ।
চিকিমিকি বেলিকা যেনেতেনে ঘৰটো ওলিয়ালে। কলিং বেলটো টিপি দিয়াত এগৰাকী আদহীয়া মহিলা ওলাই আহি তাইৰ মূৰৰ পৰা ভৰিলৈকে নিৰিক্ষণ কৰি কাক বিছাৰিছে শুধিলে । তাই উত্তৰ দিয়াৰ আগতেই হাতকটা মেক্সি পিন্ধা এজনী গাভৰু ওলাই আহিল ।
অ' এইজনী বিনিতা ! আগতে সিহঁত থকা ভাৰা ঘৰৰ লগতে কাষৰ ৰূমটোত আছিল ।
--- আহক এইটো জগত দাস মানে মোৰ হাচবেণ্ড JD ৰে ঘৰ । এইয়া মোৰ মা । পিছে আপুনি কিয় আহিলে ? এওঁ আহিপোৱাৰ আগতেই আপুনি যাবগৈ লাগিব ।
কোলাত থকা কেচুৱাটোৱে ভোক আৰু টোপনিত কলমতিয়াইছে তাইৰো মূখৰ মাত হৰিল । মূৰটো আচন্দ্ৰাই কৰি আহিছে । ভায়েকে কথাৰ কটাকটি কৰিছে । এসময়ত ভায়েকে তাইৰ হাতত ধৰি ভিতৰলৈ একপ্ৰকাৰ চুচৰাই লৈ গ'ল । তাই ধুঁৱলী কুঁৱলীকৈ এটা ফটো ফ্ৰেমত জগতে বিনিতাক সাৱতি ধৰি থকা ফটো এখন দেখিলে । ফ্ৰেমটো পুৰণি , যিটো ফ্ৰেমত সজতনে বন্ধাই থৈ গৈছিল জগতৰ লগত তাইৰ যুগ্ম ফটো । ধুনীয়াকৈ সজাই থোৱা চেণ্টাৰ টেবুলত বিনিতাই ওলিয়াই দেখুৱালে সিঁহতৰ কৰ্ট মেৰিজ চাৰ্টিফিকেট । প্ৰেমত পৰি গন্ধৰ্ব বিবাহ কৰোৱা বাবে যিখন তাইৰ হাতত নাই ,চতুৰ বিনিতাৰ হাতত আছে ।
প্ৰিয়ংকা চমুৱা
