বীৰ লাচিত বৰফুকন
ৰাজ ৰাহুল
বীৰ লাচিত বৰফুকন,
দেশপ্ৰেমিক তুমি--!
অদম্য সাহস--স্পষ্টবাদিতা
আৰু অতুলনীয় কৰ্ম-প্ৰেৰণাৰে
মহীয়ান হৈ
স্বদেশ ৰক্ষাৰ অঙ্গীকাৰেৰে
জপিয়াই পৰিছিলা ৰণাংগনত।
তোমাৰ উদাত্ত চিত্তই
সৈনিক প্ৰাণত সঞ্চাৰ কৰিছিল
যুদ্ধ জয়ৰ প্ৰৱনতা ।
স্বদেশ প্ৰেমৰ প্ৰৱল জিজ্ঞাসাই
তোমাক সজাইছিল ৰণুৱা ঘোঁৰা--
যাৰ নাছিল জিৰণি,
আনকি ৰুগীয়া দেহতো !
তোমাৰ বাবে দেশতকৈ
কোনো নাছিল আপোন,
'মোমাই কটা গড়' তাৰেই নিদৰ্শন।
হে অমৰ পুত্ৰ জননীৰ,
তোমাৰ দক্ষতা আৰু পৰাক্ৰমেই উৰুৱাইছিল
শৰাইঘাটৰ যুদ্ধত
দেশৰ বিজয় পতাকা।
শতৰু ঘূৰি গৈছিল স্বদেশলৈ--
তোমাৰ ৰণ-কৌশলক অকপটে স্বীকাৰ কৰি।
শ্ৰদ্ধাৰে সুঁৱৰিলোঁ আজি তোমাক
বীৰ পুত্ৰৰ জন্মদিন বুলি--!
লোৱাচোন পুনৰ আমাৰ শ্ৰদ্ধাঞ্জলি।
--------------
No comments:
Post a Comment