আই আজি নতুন ঘৰত প্ৰথম দিন
🔴তোলৈ বৰকৈ মনত পৰিছে
প্ৰগতি গগৈ চাংমাই, নাজিৰা
আই আজি তোলৈ বৰকৈ মনত পৰিছে অ'
নতুন ঘৰ, নতুন মানুহ
মোৰ মনত অহৰহ ভয় এটাই খোপনি পুতিছে
তোৰ অবিহনে যে মোৰ কোনো নাই
পিতাই সিফলীয়া হোৱাৰ পাছৰে পৰাই
তোৰ দুহাতত খামুচি জীৱন জীয়ালোঁ
এতিয়া..….
এতিয়া তোৰ অবিহনে মই
কেনেকৈ থাকিম এই নতুন ঘৰখনত?
নতুন ঘৰখনৰ মানুহবোৰক বুজি পাবলৈ সময় লাগিব আই
বুকুৰ ৰিক্ত আসনত
তোৰ ঠাইত শাহু আইক বহাবলৈ
চেষ্টা কৰিছোঁ আই
তই কোৱাৰ দৰেই...
যিমান পাৰোঁ সহজ হ'বলৈ প্ৰয়াস কৰিছোঁ
আজিৰ পৰা এইখনেই নিজৰ ঘৰ বুলি
নিজকে পতিয়ন নিয়াইছোঁ।
আই !
ভাইটোক চাবি
সিয়েই এতিয়া তোৰ কণাৰ লাখুটি!
দুখ কৰি নাথাকিবি
আশীৰ্বাদ এজোলোকা দিবি
সুখত থাকিবলৈ!
No comments:
Post a Comment