শৈশৱ
লৰালি অ,
আকৌ আহিবিচোন তই
এজাক কিৰিলি হৈ
বৰণীয়া পখিলাৰ পম খেদি
সোণগুটি ধাননিৰ
কাচিয়লী ৰ'দজাকৰ আচল ধৰি
আদৰুৱা মইনাৰ সংগী হৈ ।
শৈশৱৰ সামৰণিত
সময়েও ফেঁকুৰি উঠে,
জীৱনে ৰং সলায়
কৈশোৰ আহে
ন সাজে
হেপাঁহৰ আজলি ভৰাই
জীৱনে ন কৈ হাঁহে।
পিছে লৰালি জানো
উভতি আহে!
অ লৰালি,
তোৰ যে আহৰি নাই ।
সময়তকৈও অভিমানী নে তই ?
তই আহিলে
পখিলাবোৰ ছাঁই হৈ যায় যদি ?
তই জানইচোন মোৰ দুহাত ৰ'দেৰে পোৰা ।
তই আহচোন উভতি
আকৌ এবাৰ চুই চাওঁ তোক ।
মোৰ দৰে তই
ৰ'দৰ জুইত জাহ নাযাবি ।
আহ অ লৰালি
বাকি দে মোক সপোন একাজলি
বৰণীয়া হওক
জীৱন আকৌ
তোৰ দুহাত ধৰি।
✍️প্ৰিয়ংকা চমুৱা,
ঢকুৱাখনা, লখিমপুৰ,
ডাক:যোগীসূতি, পিন:৭৮৭০৫৫,
ভ্ৰাম্যভাষ:৬০০১৪৮১৪০৮
No comments:
Post a Comment