এটি প্ৰেমৰ অনুভৱেৰে
✍️ ৰাজ ৰাহুল
কোৱাচোন এবাৰ--
কেতিয়াবা সাৰে থাকেনে তোমাৰ সপোনবোৰ
মোক গোপনে জগাবলে ?
কিয় বাৰু মই ইমান উন্মনা
তোমাৰ মনৰ বতৰা পাবলে ?
পাৰৰ দুপাখিত গুজি দিম
মোৰ অনুভৱেৰে সজ্জিত চিঠিৰ টুকুৰা
আদৰি ল'বানে--
হেৰা মোৰ মৰমী প্ৰিয়া ?
কোৱাচোন এবাৰ--
মোৰ মন বননিত ফুলি ৰ'বানে তুমি
হেঁপাহৰ এপাহি ৰক্ত গোলাপ হৈ ?
তোমাৰ কোমল পাপৰিত
মলয়া হৈ আঁকি যাম চেনেহ চুম্বন--
হৃদয় উতলা
বৈ যাব প্ৰেমৰ সুবাসী নিজৰা।
দিবানে প্ৰতিশ্ৰুতি--
নদী উভতি বৈ গ'লেও
মোৰ হৃদয়-বেদীত জ্বলাই যাম বুলি
প্ৰেমৰ শলিতাৰে উদীপ্ত বিশ্বাসৰ চাকি গছি ?
হাতীপটি দেশৰ অবুজ মায়াৰে
মই সাজি আছোঁ এখন নীলিম আকাশ
পাৰি দিছোঁ জোনাকৰ দলিচা
অনুভৱত মাথোঁ তুমি--মাথোঁ তুমি ...।
No comments:
Post a Comment