প্ৰতীক্ষা: ৰাজ ৰাহুল
আজিও পূৰ্ণ হ'ল
ডায়েৰীৰ পৃষ্ঠাটি--
সেই একেটি শব্দেৰে--"প্ৰতীক্ষা"
কিন্তু কিয়--
কিয় মুক্ত হ'ব পৰা নাই
একেটি শব্দৰ পৰা ?
কিহৰ প্ৰতীক্ষাত
হেঁপাহৰ আঁচল পাতি
পাৰ কৰোঁ মূল্যৱান সময় ?
উত্তৰ বিহীন প্ৰশ্ন--,
এইয়াই চাগে মোহ--
নিজক ভালপোৱাৰ,
এইয়াই চাগে মোহ--
জীয়াই থকাৰ,
ওখোৰা-মোখোৰা জীৱন বাটত
অনিচ্ছা সত্বেও অংশ গ্ৰহণ কৰোঁ
কুট-কৌশলৰ শকুনি পাখাখেলত।
তথাপি প্ৰত্যাহ্বানৰ কাল ধুমুহাতো
মেলি আছোঁ হেঁপাহৰ দুহাত,
আজিও ঠিকনা বিচাৰোঁ
আকাশৰ নীলিম সীমনাত--।
এইয়াও যেন অগ্নি-পৰীক্ষা--
ধৈৰ্য আৰু আত্ম-বিশ্বাসৰ
প্ৰান্তত এটাই শব্দ--"প্ৰতীক্ষা"...।
No comments:
Post a Comment